haan kis ko hai mayassar ye kaam kar guzaranaa

haan kis ko hai mayassar ye kaam kar guzaranaa
ik baankpan se jeenaa ik baankpan se maranaa

dariyaa kee zindagee par sadqe hazaar jaane
mujh ko naheen gavaaraa saahil kee maut maranaa

saahil ke lab se poochho dariyaa ke dil se poochho
ik mauj-e-tah-nasheen kaa muddat ke baad ubharanaa

jo zeest ko na samajhe jo maut ko na jaane
jeenaa unhieen kaa jeenaa maranaa unheen kaa maranaa