باصر کاظمی۔ میں جانتا ہوں کہ ملنا ترا محال نہ تھا

میں جانتا ہوں کہ ملنا ترا محال نہ تھا

جبھی تو تیرے نہ ملنے کا کچھ ملال نہ تھا

مجھے تو صرف ترا پیار کھینچ لایا ہے

یہاں رقیب بھی ہوں گے مجھے خیال نہ تھا

خود اپنے آپ سے میں نے شکست کھائی تھی

مری شکست میں تیرا کوئی کمال نہ تھا

خراب حال بہر حال کوئی حال تو ہے

وہ دن بھی یاد ہیں جب اپنا کوئی حال نہ تھا

اُسی کے ہو گئے جس راستے پہ چل نکلے

سدا سے اپنی طبیعت میں اعتدال نہ تھا

گِلہ فضول ہے مُرجھا گیا جو نخلِ عشق

جو اِس زمین میں اُگتا یہ وہ نہال نہ تھا

باصر کاظمی